فضفضه عشان الكلام من فضه "باقى مذكرات عاشقة النيسكافيه"

اكتر كلام حسيت فى يوم انه بيعبر عنى هو بداية اغنية البحر بيضحك ليه الى فى الاصل للشيخ امام بس انا سمعتها من الكينج منير و بحبها طبعاً بصوته ......خلينا منخرجش بره الموضوع ليه يا ترى مستنى الكلمات دى بالاخص بالرغم انها كلمات كانت بتعبر فى وقتها عن الوطنيه و الشعور بالعجز ادام الاحتلال الانجليزى "بينى و بينك سور ورا سور و انا لا مارد ولا عصفور بايدى ناى و الناى مكسور و صبحت انا فى العشق مثل" طب ايه علاقة كل ده بيا ولا فكرت فى يوم اطير "اساساً عندى فوبيا ارتفاعات يعنى فكرة الطيران بتحسسنى بدوخه و انا اعده فى مكانى" بس ماعلينا بردو الكلام مش كله طيران من فوق السور ماهو ممكن اتعلقت بيها بسبب اسوار حياتى الى نفسى اخطى من عليها ولو بسلم صغير نص عمر ...دورت كتير على معانى عميقه ربطتنى بالاغنيه بالشكل الرهيب ده و احترت لكن فى لحظة تجلى كده لائيت الاغنيه خريطه بترسم حياتى من اولها بتحكى قصة البنت الى مش لائيه بكره و بتحاول تتأقلم مع النهارده و ساعات بتنجح و ساعات لا بس كده كده النهارده بردو بيفوت شأنا ام ابينا حكاية البنت الى جواها افكار كتير لا فادت و لا استفادت بيها محبوسه جوه راسها خنئاها حدود جمجمتها الى قربت تنفجر ماهو كل يوم فكره جديده بتنضاف و ياعالم المساحه الضيقه دى هتستحمل لحد امتى حاولت افرغ فكرى فى كلام بس قلمى مساعدنيش ماهو مش كل البشر موهوبيين و الا كان العالم بئى ورقه كبيره و مجموعة الوان نايى المكسور صعب عليا اعبر برغم حبى الكبير و الغير مبرر للكتابه و خايفه افضل طول حياتى على نفس السؤال الى يحير البحر بيضحك ليه............!!!